Бид ээлжит ярилцлагын зочноор “Стора Централ ХХК”-ийн гүйцэтгэх захирал О.Энхжин-г урилаа. Энэхүү ярилцлагаараа түүний ажил мэргэжил, карьераас илүүтэй хобби, сонирхлын талаар ярилцсан юм. Тэрээр бидэнтэй чөлөөт цагаа хэрхэн өнгөрөөдөг, анх яаж номтой нөхөрлөх болсон, түүнчлэн ном уншихад цаг заваа хэрхэн яаж хуваарилдаг талаарх үнэ цэнтэй туршлага, зөвлөгөөгөө хуваалцсан юм.

Ер нь их олон хоббитой. Мотоцикл унадаг, сэлэх дуртай, сүүлд боксоор хичээллэж эхэлсэн бас ууланд алхдаг болоод 2 жил гаран болж байна. Эдгээр зүйлс надад нэг төрлийн бясалгал шиг байдаг юм. Тархи унтраад зөвхөн махан биеэ зовоох нь нэг талаар энергиэ хадгалах, стресс багасгахад хэрэгтэй санагддаг, өөрөө ч үүндээ дуртай, кайф авдаг даа. 

Нэмээд кино болон хөгжим их сонирхдог. Киног ялангуяа судалж, найруулагчийн хэлэх гээд байгаа санааг ойлгож, жижиг деталь бүрийг нь анзаарч үзэхийг хичээдэг. Худалдааны шинж чанартай гэхээс илүү нарийн утга агууламж, өөр шинж чанар бүхий бүтээлүүд их сонирхол татдаг болохоор аль болох ховор сонин киног хайж олж үзэх нь гоё байдаг юм. 

Гэхдээ хамгийн гол сонирхол, цаг их зарцуулдаг нэг зүйлээ хэл гэвэл ном л юм байна даа. Хүний хандлага, хүмүүжил, сэтгэн бодох цар хүрээнд хамгийн томоор нөлөөлдөг хэрнэ зардал маш багаар олж авах боломжийг олгодог зүйл нь ном байх. Энэ сонирхол минь одоогийн намайг бий болгож яваа нэг том нөлөөлөл байх л гэж боддог доо.

Бага байхад одоогийнх шиг сошиал, интернэт байхгүй шүү дээ, нэг их дээр үеийн хүн шиг /инээв/. Дээр нь манай аав ээж хоёр ном их уншдаг байсан болохоор харж өссөн надад нөлөөлсөн юм шиг байгаа юм. 

Уран зөгнөлт ном уншиж эхэлсэн маань номд дуртай болоход уйдалгүй тогтвортой уншиж сурахад их тусалжээ гэж боддог. Учир нь зөгнөлт зохиол бидний амьдарч буй бодит амьдралаас огт өөр, төсөөллийн ертөнцөөр аялуулдаг болохоор уншиж байгаа номдоо улам шимтэж төсөөлөн бодох, мөрөөдөх чадварыг маань сайжруулсан санагддаг. 

Ялангуяа Жюль Вернийн “Усан доогуур 20000 бээр аялсан нь”, “Дэлхийг 80 хоногт тойрсон нь” , “Дэлхийн төв уруу аялсан нь” гэх мэт алдартай зохиолуудын уншиж өссөн болохоор номд дуртай болж, тэр ертөнцөөр аялж, бүтээлч сэтгэхүйгээ хөгжүүлж чадаж дээ гэж их баярладаг. 

Хүүхдийн болон үлгэрийн номуудын их том цуглуулгатай байсан, одоо бодоход түүнийгээ хадгалаад хүүхдүүддээ өгдөж байж гэж бага зэрэг харамсдаг л юм.

Одоо бол ажлын шаардлагаар мөн өөрийн сонирхлоор бизнесийн кейсүүдийн талаар, бусдын туршлага, хэрхэн амжилттай бизнес босгож байсан алдаа онооны талаарх түүхүүдийг унших дуртай. 

Гэхдээ хэзээд миний дуртай төрлийн ном ерөөсөө л уран зөгнөлт романууд хэвээрээ. Энэ төрлийн номоо уншихаар тархи амарч, байгаа орчноосоо таслагдаж, мөрөөдөхөд тусалдаг болохоор гоё байдаг даа. 

Дуртай зохиолчдоосоо гэвэл хамгийн түрүүнд Александр Дюма-г нэрлэнэ. Багаасаа л уншиж өссөн одоо ч дахин давтан уншихад зохиолууд нь янзыг гоё. Чарльз Дикенс, Виктор Хьюго-д бас их дуртай. Тэд бол яах ч аргагүй Европын сонгодогууд л даа. Сүүлд гэвэл Харари үнэхээр ёжтой бас мэдлэг олгохуйц судалгаатай уншууртай бичдэг санагдсан. 

Бизнесийн чиглэлийн ном гэвэл өөрийн туулж байгаа замналд таарах эсвэл ижил төрлийн бизнес эрхэлж байсан хүний номыг унших илүү үр дүнтэй санагддаг. Ер нь хүлээн зөвшөөрөгдсөн, дэлхийд үнэ цэнтэй утга учиртай үйл хэрэг хийж яваа хүний туршлагыг унших боломж байвал унших л хэрэгтэй гэж боддог доо, ном ч бас их гаргадаг болж. 

Нэлээн завгүй байдаг учраас мэдээж цаг заваа зохицуулахад хүндрэлтэй үеүд байдаг. Гэсэн хэдий ч миний бодлоор үргэлж завгүй байна гэж бодоод явдаг хүн зүгээр л цагаа зөв хуваарилж чаддаггүй хүн байх магадлалтай гэж. 

Тэгэхээр яг цагийг үр бүтээлтэй ашиглая гэвэл хуваарь гаргах, тухайн хуваарьтай тааруулан хийх зүйлээ дуусгах сахилга бат өөртөө суулгах юм байна гэдгийг ойлгоод үүн дээрээ сүүлийн үед их ажилладаг болсон. Ингэхээр өдөртөө яг 1 цагийг уншихад зарцуулж болоод байгаа. Энэ 1 цагаа өдөр ажлын завсарлагаар, орой унтахын өмнө гээд 30 минутаар нь хуваачихдаг. 

Би ер нь номыг яг хэвлэмлээр нь унших дуртай. Дээр үеийн хэвлэлтүүдийг нь хадгалж зармыг нь зорьж хайж авдаг. Багын дурсамж сэргээд бас үнэр нь гоё байдаг юм. 

Номын дэлгүүрүүдээр хайгаад ороход олддоггүй номууд зөндөө л дөө. Тийм номуудаа онлайн дэлгүүрүүдээр Америкаас ч юм уу захиад авчихдаг. Сүүлд Английн зохиолч Мэтт Хейг-ийн “How to stop time” гээд зөгнөлт зохиолыг уншмаар санагдаад захиж авсан. 

Сүүлийн үеийн манайд хийгдэж байгаа орчуулгын номууд ер нь сайжирсан байна лээ. Гэхдээ аль болох гадаад хэл сураад эх хэл дээр нь зохиолчийн үгээр унших илүү мэдрэмж өгдөг болохоор номоо онлайнаар захиад англи хэл дээрх номыг бол тухайн хэлээр нь уншихыг боддог.

Уншиж сурна гэдэг цаагуураа төвлөрч, тогтвортой сууж сурсан чадвар юм болов уу гэж боддог. Тэгэхээр энэ чадвартайгаа ажиллах хэрэгтэй байх. 

Гэхдээ хүн дуртай зүйлдээ цаг зарцуулаад төвлөрч ер нь болоод байдаг шүү дээ. Иймээс хамгийн түрүүнд ямар төрлийн ном уншихаар уйдахгүй улам цаашаа хуудсаа эргүүлж одоо юу болох бол гэж бодож байна гэх номоо олох нь чухал санагддаг. 

Мөн одоо олон зүйлс хөгжөөд заавал цаасан ном бариад суух шаардлагагүй болсон, тийм цаг зав ч ховор учраас түгжрэлд эсвэл алхаад явж байхдаа аудио хэлбэрээр ном сонсох байдлаар өөрийгөө эхлээд дасгах нь зүгээр болов уу.

Хэрэв ном уншиж хэвших гэж байгаа хүмүүс байвал Жюль Верн, Пауло Коэльо, Мишель Обама-н номуудаас эхлээрэй. Маш хөнгөн, хүсэл мөрөөдөлтэй, сониуч хэрнэ энгийн бичсэн номуудтай санагддаг. 

Залууст бол “Алхимич” номыг, бүсгүйчүүд магадгүй Анчи Мин-ийн “Үйлийн үр” зэрэг номуудыг уншаад үзвэл бидэнд илүү ойр буух мэдрэмж өгөх санагддаг.

Би сүүлд топ түвшний удирдлагууд тэр дундаа дэлхийн шилдэг компаниудын Гүйцэтгэх захирлуудад coach хийдэг Marshal Goldsmith-н “What you got here, Won't get you there” гээд номыг уншсан. Хэзээ хамгийн сүүлд ийм нүд нээсэн, бодол санааг маань тодорхой түвшинд ахиулж чадах ном уншлаа гэж бодогдсон маш хэрэгтэй ном байсан. Хүнтэй ажилладаг, бизнес бий болгож удирдаж яваа хүн бүр уншаасай гэж хүсэхээр юм байна лээ.

 

✨STORA.MN 10-р сарын 16-ны өдрөөс 10-р сарын 23-ны өдрийг хүртэл ШИНЭ ХЭРЭГЛЭГЧИЙН УРАМШУУЛАЛ зарлалаа.✨

Та дээрх хугацаанд https://www.stora.mn/ -д шинээр бүртгүүлэн худалдан авалт хийхдээ ашиглах урамшууллын эрхээр хэтэвчээ цэнэглүүлээрэй. 💛